တစ်နေ့က ကျွန်တော် အင်တာနက်ဂျာနယ်ဖတ်တော့ ပိတ်ထားတဲ့ ဝက်ဘ်ဆိုက် ၃၅,၀၀၀ ကျော်ကို ပြန်လည်ကြည့်ရှုခွင့် ပေးတယ်လို့ သတင်းအချက်အလက်နဲ့ နည်းပညာ ဌာနက အင်ဂျင်နီယာချုပ်က ပြောတဲ့အကြောင်း ဖတ်ရပါတယ်။ ခုရက်ပိုင်းအတွင်းမှာပဲ မဖွင့်စဖူး ဆိုက်တွေ တော်တော် ပွင့်နေတာမို့ သိပ်မယုံချင်ဘူး။ တစ်လောကလဲ ပွင့်တယ်ဆိုပြီး မကြာပါဘူး ပြန်ပိတ်သွားတာပါပဲ။ ခုတော့ အင်တာနက် ဂျာနယ်လိုမျိုးက ဖော်ပြတယ်ဆိုတော့ ဒါဟာ တရားဝင် ဖြစ်သွားပြီလို့ ယူဆရပါတယ်။
ဒီတစ်ပတ် အင်တာနက် ဂျာနယ်ကိုဖတ်ရတာ သတင်းထူးတွေချည်းပဲ ဖတ်ရပါတယ်။ နောက်သတင်း ကောင်း တစ်ခုကတော့ ကွန်ပျူတာ တက္ကသိုလ် ဘွဲ့သင်တန်းကို ၂၀၁၁-၂၀၁၂ ပညာသင်နှစ်ကနေ စပြီး တစ်နှစ်ထပ်တိုးမယ်လို့ သိရပါတယ်။ ဒါလဲ သတင်းကောင်းပါပဲ။ တကယ့်ကို လက်တွေ့နဲ့ သီအိုရီပိုင်း သင်ကြားပေးနိုင်မယ်ဆိုရင် မြန်မာနိုင်ငံ အိုင်တီကဏ္ဍအတွက် မျိုးဆက်သစ်တွေ အများအပြား ပေါ်ထွက်လာကြမှာပါ။ ဒါပေမယ့် တက်လက်စ ကျောင်းသားတွေကတော့ ဘဝင်ကျလှမယ်တော့ မထင်ဘူး။ 
နောက်တစ်ခုကတော့ ၂၀၁၅ မှာ broadband အင်တာနက် စနစ်ကို ဈေးနှုန်းချိုသာစွာ အသုံးပြုနိုင်ရန် ဦးတည်ထားရှိပြီးဖြစ်တဲ့အကြောင်း၊ (မျှော်ဟော်ဟော်ပေါ့.. ) အခြေခံပညာရေးမှာ ကွန်ပျူတာ နည်းပညာ ဘာသာရပ်ကို တွဲဖက် သင်ရိုးအဖြစ် ပြဌာန်း မယ်လို့လဲ ဖတ်ရပြီး တစ်ပတ်မှာ တစ်ခါ ကလေးတွေကို ကွန်ပျူတာ သင်ကြားပေးမယ်လို့ ဆိုပါတယ်။ တကယ်ကို ကလေးတွေကို စေတနာ ရှေ့ထားပြီး သင်ပေးဖို့လိုတယ်။ ဆရာမတွေ သီးသန့်သုံးတဲ့ ကွန်ပျူတာခန်း မဖြစ်ဖို့လဲ လိုပါတယ်။ ဝန်ကြီးလာကြည့်မှ ဟန်ပြ ကွန်ပျူတာ သုံးပြတာမျိုး မဖြစ်ဖို့ လိုပါတယ်။
ဘာပဲဖြစ်ဖြစ် ပြောင်းလဲဖို့ ကြိုးစားနေပြီလို့ အသိမှတ်ပြုလို့ရပါတယ်။ အရေးကြီးတာ အရပ်ဘက် အဖွဲ့စည်းကိုယ်စားပြု အဖွဲ့တွေကလဲ အစိုးရဝန်ကြီးတွေထိ ရောက်အောင် စွမ်းဆောင်နိုင်ရက်နဲ့ တကယ်ပြောင်းလဲ သင့်တာလေးတွေ ပွင့်ပွင့်လင်းလင်း တင်ပြစေချင်ပါတယ်။ အိုင်တီလောက ဖွံ့ဖြိုးရေးအတွက် ကိုယ်ကျိုးမဖက်ဘဲ စေတနာ ရှေ့ထားပြောပေးမယ်ဆိုရင် ဖြင့် သာဓုခေါ်တယ်ပေါ့ဗျာ။ လောလောဆယ် ဝက်ဘ်ဆိုက်လေးတွေ ပြန်ဖွင့်လို့ ကျေးဇူးတင်ပါတယ်။ နောက်လဲ bandwidth အပြည့်ရအောင် စွမ်းဆောင်ပေးကြပါအုံးလို့..။
