Dec
24
ဒီလိုဗျာ…
ကျွန်တော်တို့ တတွေ အရည်မရ အဖတ်မရတွေကို ဆက်လက်စားသုံးနေသ၍
စကားများကြတာပဲ အဖတ်တင်မယ်….
မိမိအတ္တ အစွန်းထွက်တွေ မပါတဲ့ ရောင်းတန်းဝင် လူကြိုက်များ
ဖက်ရှင်ထွင်လုံး သက်သက်တွေဆိုတာ .. တကယ်က သုံးစား မရဘူးဗျ
ဘယ်လိုပဲ ဗားရှင်းအသစ်ထွက်ထွက်.. မူလအပေါ် အခြေခံတဲ့ ညွှတ်ယိမ်းမှုတွေကို..
လက်ခံလိုက်ကြမယ်..
ပိုက်ကွန်ထဲက မြေခွေးတစ်ကောင်ရဲ့ အရိပ်လက္ခဏာမျိုးကို ရွေးချယ်မှာလား
တဝက်အောင်မြင်ခြင်းဆိုတာ. ဆန္ဒရှိသူရဲ့ မှန်ထဲက ဖျက်ဆီးနိုင်ခြင်း..တွေကိုပြောတာ..
ဖြောင့်ဖြောင့်တန်းတန်း သွားချင်သွားမည်။
သဘောတူညီမှု ရရှိပြီးသား ပိရမစ်တွေဟာ.. ရယ်မောသံများနှင့်အတူ
ကျွန်တော်တို့လိုပဲ… အချစ်နာကျ..နေကြ….
ကတိကဝတ်များသည် အလွန်ကျယ်လောင်သော မိုးခြိမ်းသံများလို/
စကားအလွန်များသော… မိန်းမကြီးများလို…..
Learn wisdom by the follies of others.
လက်အိတ်ဟာ ခြိမ်းခြောက်မှုတွေ ပြည့်နှက်နေတယ်
အို.. ဘုရားသခင်…
ငတ်မွတ်ခြင်းတွေကို… မဖြေသိမ့် နိုင်သေးသရွှေ့တော့.. ကျွန်တော်တို့
ခြေထောက်တွေက ရှက်နေလိမ့်မယ်…
ဆိုလိုတာက..
နတ်အလိုမလိုက်နိုင်သော လူ၏ အလိုကို ခုတုံးလုပ်ပြီး
ကျွန်တော်တို့ ပေတေခြင်း အမြှီးတွေကို ကျည်တောက်စွပ်ကြည့်ခြင်း သာဖြစ်ပါတယ်။
အသက်ရှူမဝသော လူငယ်များ၏ ဆန်းသစ်မှုများဆီက ရုန်းထွက်ပြေးဖို့ မဖြစ်နိုင်ပါ။
သီချင်းများ သံပြိုင်သီဆို ကြပြီး မျက်နှာမူ၍ နေထွက်လိုက်ကြ၏။
ဖယောင်းတိုင်များကို မီးမှုတ်ငြိမ်းသတ်ကာ သွေးထွက်သံယိုဖြစ်နိုင်သော ဓားရှည်ကို ထိန်းသိမ်းလိုက်ပါသည်။
သမိုင်း၏ နောင်တရမှုတွေဆီက ဆင်းသက်လာသောအခါ…
ကျွန်တော်တို့ ဖိနပ်တွေ စီးထားကြဖို့ လိုအပ်မည် ဖြစ်ကြောင်း…..။
Posted in poem
Dec
21
ကဗျာတွေ ဖတ်တဲ့ ကျွန်တော့် သူငယ်ချင်းတွေက ပြောတယ်။ မင်းဘလော့ ဖတ်ရတာ ရှုပ်နေတာပဲတဲ့။ ဟုတ်တော့လဲ ဟုတ်ပါတယ် ကျွန်တော်က သတင်းတွေလဲရေး၊ အက်ဆေးတွေလဲရေး၊ ခရီးသွားဆောင်းပါးတွေရော စုံစီနဖာ ဆိုတော့ အဲ့လို သီးသန့် ဖတ်တဲ့သူတွေ အတွက် ဘယ်အဆင်ပြေပါ့မလဲ။ လက်ရှိ ကျွန်တော်ရေးနေတဲ့ ဘလော့ဂ်က စလုပ်ကတည်းက ဘလော့ဂ်ရေစီးကြောင်း အတိုင်း သွားနေတော့ ဒီပုံစံလေးကို တော့ မပြင်ချင်တော့ဘူး။ ဒီတော့ ကဗျာတွေ သီးသန့် ဖတ်ပေးမယ့် သူငယ်ချင်းတွေ လဲ အဆင်ပြေအောင် ကဗျာတွေ ချည်း သီးသန့် စုစည်းထားတဲ့ ကဗျာဘလော့ဂ်လေး တစ်ခု လုပ်လိုက်ပါတယ်။ ဒါပေမယ့် တစ်ခုတော့ ရှိတယ် ကျွန်တော် အရင်ရေးခဲ့တဲ့ ကဗျာလေးတွေတော့ အဲ့ဒိမှာ ပါလာမှာ မဟုတ်ပဲ။ အခု အသစ် တင်ထားတဲ့ လေးပုဒ်လောက်ကနေ စပြီး တင်မှာပါ။ ဆိုတော့ ကျွန်တော့်ကဗျာတွေကို အခု ဒီဘလော့ဂ်မှာလဲ အလျဉ်းသင့်သလို တင်မယ် ဟိုဘလော့ဂ်မှာလဲ တင်မှာပါ။ အဲ့ဒိဘလော့ဂ်မှာတော့ ကဗျာသီးသန့်ဆိုတော့ ကဗျာဖတ်မယ့်သူတွေ အတွက် မျက်စိရှင်းတာပေါ့။ ကျွန်တော် လုပ်ထားတဲ့ ဘလော့ဂ်လေးကတော့..
mypoetrynote.wordpress.comဖြစ်ပါတယ်။ လာလည်နိုင်ပါတယ် ခင်ဗျာ။ 
Posted in Announcement, poem
Dec
21
မနေ့က စိမ်းလန်းစိုပြည်ထဲမှာ ပြုလုပ်တဲ့ အလင်းပျိုးလက်များ ကဗျာရွတ်ပွဲကို အောင်မြင်စွာ ကျင်းပပြီးစီး ခဲ့လို့ ဝမ်းသာ ဂုဏ်ယူမိပါတယ်။ တက်ရောက်ခဲ့ပေးကြတဲ့ သူငယ်ချင်းများ၊ စာနယ်ဇင်းဆရာများအားလုံးကို ကျေးဇူး တင်ပါတယ်။ ကျွန်တော်တို့တွေ အပင်ပန်းခံ ကြိုးစား ထားသမျှလေး အောင်မြင်သွားလို့ အရမ်းပျော်မိပါတယ်။ မနေ့က ပွဲကို လူဦးရေ ၁၀၀ လောက် တက်ရောက်ခဲ့ကြလို့ ကျွန်တော်တို့ DOI ကဗျာကလပ် လုပ်ခဲ့သမျှ ပွဲတွေထဲမှာ ဒီပွဲက လူအများဆုံး ပါပဲ။ ပရဟိတပွဲလေးလဲ ဖြစ်လို့ ဧည့်သည်တွေ များများလာကြတာ ထင်ပါတယ်။ ပွဲကလေးကို အစက ကော်ဖီဆိုင်ထဲမှာ လုပ်မယ်ဆိုပြီးမှ ပွဲစရိတ်အတွက်ချည်းပဲ စရိတ်စက တွေများနေမှာစိုးလို့ ကျွန်တော်တို့ မြက်ခင်းပေါ်မှာပဲ လွတ်လွတ်လပ်လပ် လုပ်လိုက်ကြတယ်။ မထင်မှတ်ပဲ လုပ်လိုက်တဲ့ မြက်ခင်းပြင် ကဗျာရွတ်ပွဲလေးဟာ ကန်ရေပြင်ကို နောက်ခံပြုရင်း အရိပ်အာဝါသလေး အောက်မှာမို့ တော်တော်လေး လိုက်ဖက်ညီသွားတယ်လို့ ပြောလို့ရနိုင်တယ်။ (ကိုမိုးလှိုင် ကတော့ ကမ္ဘာပေါ်မှာ မြက်ခင်းစိမ်းတွေ ပျောက်သွားတဲ့ နိုင်ငံတွေ အများကြီး ရှိပါတယ်။ ကျွန်တော်တို့မှာတော့ အခု ထိုင်စရာ မြက်ခင်းတွေ ရှိနေသေးလို့ ဂုဏ်ယူရပါတယ်လို့ ပြောသွားပါတယ်။)
ပွဲစတော့ အဖွင့်ရွတ်မယ့် မအိန္ဒြာကဗျာက ပရင့်ထုတ်ထားတဲ့ အထဲမပါလို့ လှည်းတန်းကို ပြေးရသေးတယ်။ ကျွန်တော် ပြန်ရောက်တော့ လူတွေက တော်တော်စုံနေပြီ။ အားလုံး မြက်ခင်းပေါ်မှာ ဝိုင်းထိုင်ပေးဖို့ သူရဿဝါက request လုပ်တော့ အားလုံး ထိုင်ပေးလိုက်တဲ့ အခါကျမှ လူတွေ တော်တော်များမှန်း သတိထားမိတော့တယ်။ အဲ့ဒိနောက် အခမ်းအနား အစဖွင့်ကို တို့ချစ်တဲ့ကမ္ဘာ သီချင်းလေးနဲ့ စဖွင့်ပါတယ်။ အဲ့ဒိနောက် ကဗျာများကို ရွတ်ဆိုကြတယ်။ မနေ့က ရွတ်တဲ့ ကဗျာတွေနဲ့ ကဗျာရွတ်ဆိုသွားသူတွေကတော့
သုခကြယ်- မင်းယွန်းသစ်
အနာဂတ်ရှိတယ်/ဖြစ်တယ် -ကိုဖုန်းမြင့်
အလင်းပျိုးလက်များ – သူရဿဝါ
ဆူလွယ်နပ်လွယ် သားကောင် – မိုးလှိုင်ည
လက်ကမ်းကြိုမယ် – နေနှင်းစက်
ဖြစ်ရပ်မှန် – လူလိန်
မြန်နှုန်းမြင့်စိတ်နဲ့ပဲ မေမေ့ကို ဆက်သွယ်လိုက်တော့မယ် – မင်းယွန်းသစ်
ငါတို့ရဲ့လက်တွေ – မေရာ
အနာဂတ်မဲ့ လက်များရဲ့ မနက်ဖြန် – ဆူးခက်မင်း
လင်းနေတဲ့ အပိုင်းဆို မင်းတို့ပဲ လုပ်ထားတာ မှောင်နေတဲ့ အပိုင်းတွေက ငါတို့ အပြစ် ရှိပါစေ- သူရဿဝါ
မှောင်နေတဲ့ အလင်း – မိုးလှိုင်ည
နတ်ဆိုးနမ်းသွားတဲ့ ပန်း- ကိုလင်းနစ်
မေမေ့ဆီရေးတဲ့ စာမျက်နှာမှာ ခြစ်ရာတွေ ဗရပွနဲ့ – မင်းယွန်းသစ်
တို့ဖြစ်ကြပါတယ်။
ကဗျာတွေ ရွတ်ပြီးကြတော့ ပါဖောင့်မန့်အစီအစဉ် လေး တစ်ခု အဖြစ် သတင်းစာ ဂျာနယ်တွေ ထဲက ဖြတ်စတွေကို ဗီနိုင်း တစ်ခုပေါ်မှာ ဝိုင်းဝန်းကပ်ပြီး ကဗျာပါဖောင့်မန့်လေးကို စုပေါင်း လုပ်ဆောင် ကြပါတယ်။ ကိုယ်စိတ်ကူး တည့်ရာ စကားလုံးလေးတွေ တွဲပြီး ကဗျာစပ်ဆို နိုင်တဲ့ ဒီအစီအစဉ်လေးကိုတော့ တက်ရောက်လာကြတဲ့ သူတွေ တော်တော်များများ ပျော်ရွင်စွာ ဝိုင်းဝန်းကပ်ကြပါတယ်။ (တညလုံး ကျွန်တော်တို့အဖွဲ့ ဝိုင်းညှပ်ထားရ ကျိုးနပ်သွားပါတယ်)
အဲ့ဒါလေး ပြီးတော့ ကျွန်တော်တို့ ကို မြက်ခင်းပေါ်မှာ အိပ်စေပြီး HIV စကားလုံး သရုပ်ဖော်စေကာ ဓာတ်ပုံရိုက်ကြသေးတယ်။ ကြုံတုန်း ကိုညီလင်းဆက် ကလဲ ကျွန်တော်တို့ တတွေ လုပ်မယ့် Barcamp Yangon အကြောင်း ရှင်းပြ ပေးခဲ့ပါတယ်။ ပွဲက ပြီးနေပြီဖြစ်ပေမယ့် အသိတွေက များတော့ ဓာတ်ပုံတွေ စုရိုက်နေကြတာနဲ့ တော်တော် အချိန်များ သွားတယ်။း) အပိတ်သီချင်းအဖြစ် Sleeping Child သီချင်းကို သံပြိုင် ရွတ်ဆို ပေးခဲ့ကြပြီး အောင်မြင်စွာ ပြီးဆုံး ခဲ့ပါတယ်။ နောင်များမှာလဲ ဒီလို ကဗျာရွတ်ပွဲလေးတွေ လုပ်တဲ့အခါ မှာလဲ တက်ရောက်ပေးဖို့ ဖိတ်ကြား လိုပါတယ်။
Special Thanks to Ko Thoe Htane & Nang Nyi for photos.
အလင်းပျိုးလက်များ အင်္ကျီ
ကိုမိုးလှိုင်ညကဗျာရွတ်နေစဉ်
ကိုဖုန်းမြင့်ကဗျာကို ကျွန်တော် ရွတ်ဆိုနေတာပါ။
ကိုဖုန်းမြင့် ရွတ်ဆိုနေစဉ်
မမေရာ ရွတ်ဆိုနေစဉ်
စကားလုံးများဖြင့် ဝိုင်းဝန်း တည်ဆောက်နေကြသူများ
စုပေါင်း (Collage) ကဗျာ
HIV သရုပ်ဖော် စာလုံး
အပိတ် သီချင်း အဖြစ် Sleeping Child သီချင်းကို သံပြိုင်သီဆို ပေးနေကြစဉ်
ပွဲဖြစ်မြောက်ရေး ဝိုင်းဝန်းကူညီပေးကြတဲ့ သူငယ်ချင်းများနှင့် အမှတ်တရ
Thanks for reading.
Posted in News, Today Yangon, poem
Dec
19
တံခါးတွေက စကားတွေ အများကြီး ပြောတယ်။
ခေါ်ဆိုသံ မဲ့နေသော တယ်လီဖုန်းကို
မအားမလပ် ပြန်လည် ဖြေကြားရန် မဖြစ်နိုင်ပါ။
ည၏ အနမ်းတရှိုက်ကြောင့် လှစ်ဟာသွားသော ကန်ရေပြင်၏
မျက်နှာပြင်သည် လမြင် ကြယ်မြင် …. ပါပဲ။
ရော့ခ်အန်ရိုး… တေးသွားနှင့် ဓမ္မကျမ်းစာအုပ်..
ဘယ်နှခုမြောက်မှန်း မသိသော လီဆယ်မှု များမှ တဆင့်
သူတော်ကောင်းတွေ ဝတ်တယ်ဆိုတဲ့ ဝတ်ရုံထဲ တိုးဝင်သွားတယ်။
ကျွန်တော်တို့တတွေ/ ခင်ဗျားတို့ တတွေ
ပဋိပက္ခများကို အတူတကွ လက်မခံတတ် ကြတဲ့အခါ
ဖန်တီးစရာ မလိုသော ဘေးထွက်ဆိုးကျိုး ရပ်ဝန်းများကို ထုဆစ် လိုက်ကြတယ်။
အိပ်ပျော်အောင် အိပ်လိုက်သည်။
ဓာတ်ခဲကုန်နေသော လရောင်များ… အကြောင်း ပြတင်းတံခါးတွေနားက
ငှက်တွေ လျှို့လျှို့ဝှက်ဝှက် ပြောနေကြလိမ့်မယ်။
(ရီမုဒ်ကွန်ထရိုးကနေ Next ကိုနှိပ်၍ ကျော်ပါ)
ရစ်သမ်တွေ ၊ ကာရံတွေ၊ တေးသွားအမှတ်အသားတွေနဲ့
အခုထိတော့ .. သုံးကြိုးမြောက် တူရိယာ ကြိုးကို မဆက်ရသေးဘူး။
သပ်သပ်ခတ်ခတ် နှင့် ကြိုတင်စီမံထားသော လမ်းမကြီးပေါ် ပက်ကြားတွေတက်အပ် အုံးမှာလား။
မျိုးရိုးဗီဇ အမှိုက်ကို လိမ်ကျစ်ရင်း စံချိန်စံနှုန်းမှီ တွင်းနက်တွေထဲ ဆင်းသွားကြ၏။
မီးကြောင့် သင်မလောင်ပါစေနှင့်….
ဂြိုလ်ကြီး ၈လုံး စူပါနန်းကြိုးမျှင်သီအိုရီ…၊ အိုင်းစတိုင်းမှာ ကိုယ်ပိုင် ဘလော့ဂ်တခု မရှိ။
ဆိုတော့ကာ….
ကျွန်တော့်ကို မော့သောက်နေသော ပုလင်းများအား ဒါနပြုခြင်းအားဖြင့်
ဖြစ်ပေါ်လာနိုင်သော လော်မာဖောက်ပြားမှုများကို အရစ်ကျပေးချေခြင်းသာ ဖြစ်သည်။
မျှော်လင့်ထားတာ/ မမျှော်လင့်ထားတာ ၂ခု ကြား လွဲမှားမှုမှာ ရာနှုန်းပြည့်ဖြစ်၏။
ကျွန်တော်တို့ ကိုယ့်ကိုကိုယ် ချွေတာဖို့ တပတ်ရစ် နေ့စွဲများကို စားသုံးပါ။
ဧရိယာ ပြင်ပသည် ဆက်သွယ်မှုသို့ ရောက်နေ၏။
တစွန်းတစမျှ မကြားဖူးသော ပုံပြင်များကို နာရီအကုန်ခံ၍ အိပ်ယာဝင်သည့်အခါ
တပ်ဆင် အသုံးမပြုပါနှင့်…။
စိမ်းလန်းမှုများကို အသေအကျေ မြတ်နိုးပစ်လိုက်ပါ။
ဖုံးကွယ်ထားသော.. လိုက်ကာများကို လှစ်ဟ နေပါစေ။
Posted in poem
