အတင်းပြောတတ်သော ဒေါ်အေးသန်းသည် အသုပ်ရောင်းသူ ဒေါ်မြင့်ကြည် ထံသို့ သတင်း ထူး တခု လာဖောက်သည် ချနေသည်။ မန်ယူဖလားရလို့ ဆိုပြီး ကိုမြင့်ခိုင်က ရပ်ကွက်လုံးကျွတ် မီးခိုးတိတ် အလှူလုပ်သည်။ ရပ်ကွက်ထိပ်တွင် တနေ့ကမှ ပြောင်းလာသော အိမ်သည် မိသားစုသုံး ယောက်သာရှိကြောင်း သိရသည်။ အမှန်က လေးယောက် ရှိသည် ပြော၏။ အကြီးဆုံးသားမှာ သင်္ဘောလိုက်သွားပြီး အငယ်မလေးသာ မိဘနှင့် ကျန်ခဲ့သည်ဟု သိရသည်။ ထိုကောင်မလေးသည် အတော်ပင် ချစ်စရာကောင်းလှသည်။ ယခုနှစ်တွင် ဆယ်တန်း တက်မည်ဖြစ်သော သူ့သားအား ဒေါ်မမ က အကောင်းဆုံးဝိုင်းတွင် သိန်းနှင့်ချီ အကုန်ခံ၍ ထားကြောင်း လူတကာကို ကြွားလုံးထုတ်နေ၏။

မည်သို့ပင်ဖြစ်စေကာမူ လူပျိုကြီး သာထွန်းသည် လူဝတ်ကြောင် စွန့်တော့မည် ဖြစ်ကြောင်း အခိုင်အမာ ပြော၏။ ချိန်လိုက်တိုင်း ပါနေ၍လည်း ဖြစ်နိုင်သည်။ အိမ်ထဲကနေ ငိုယိုပြီး ထွက်လာသော တူးတူးလေးအား ဘာဖြစ်တာလဲလို့ အောင်အောင်က မေးတော့ “အဖေပေါ့ဂျာ အနော်က ဒီအိမ်ကြီး အနော်ဘယ်တော့ ပိုင်မှာလဲ ဆိုတော့ ငါသေမှတဲ့၊ ဒါနဲ့ အနော်က ဒါချို အဖေ ဘယ်တော့ သေမှာလဲ လို့ မေးမိတာ နားရင်းကို ကြယ်တွေ မြင်အောင်ကို ဆော်လိုက်တယ်…ဘာမှန်းလဲ သိပါဘူးဂျာ ဒါလေးမေးမိတာကို” ဟု ပြောကာ ခေါင်းကုတ်ရင်း ကောင်းကောင်းတို့ ကျောက်ဒိုးရိုက်နေတဲ့ နေရာကို ထွက်သွားသည်။ ပိတ်ဆို့နေသော ရေမြောင်းများကြောင့် မိုးသည်းထန်စွာ ရွာသည်နှင့် အိမ်တွေထဲ ရေ၀င်ကုန်တော့သည်။ rapper ရူးရူးနေသော ပေါက်စသည် အလွန်ပူအိုက်သော နေမွန်းတည့်ချိန်ကြီးတွင် သိုးမွှေးအနွေးထည်အပွကြီး ကို ဘောင်းဘီ အပွကြီးနှင့် ၀တ်ကာ တကိုယ်လုံး ချွေးများ ရေချိုးထားသကဲ့သို့ အိုင်ထွန်းနေတော့၏။ ထိုဆိုက်ကား ဂိတ်လေးတွင် ဆိုက်ကား အစင်းရေ ၅၀ခန့် ရှိသော်လည်း အများစုမှာ နေ့ခင်းပိုင်းတွင် ထွက်လေ့မရှိပဲ အိမ်ပြန် တရေးတမော အိပ်ကြသည်က များသည်။ ရပ်ကွက်လူကြီး ဦးတင့်ဆွေသည် ညပိုင်း ၈နာရီကျော်လျှင် ရေချိန်ကိုက်နေပြီ ဖြစ်၏။ ကျော်မင်းသည် အသစ်ပြောင်းလာသော ကောင်မလေးကို လိုက်မည်ဟု သူ့သူငယ်ချင်းများ ကြားတွင် တရားဝင် ကြေငြာလိုက်သည်။

ကိုမြင့်ခိုင်သည် မန်ယူဖလားရသော ပုံအား ဗီနိုင်းလုပ်ကာ သူ့အိမ်ရှေ့တွင် ၀ံ့ဝံ့ကြွားကြွား ချိတ်ဆွဲထား၏။ ဆယ်အိမ်ခေါင်း ကိုမင်းမင်း သည် သူ့အိမ်ရှေ့တွင် တောင်လိုပုံနေသော အမှိုက်မပစ်ရဆိုင်းဘုတ် ဆိုက်ထူထားသော နေရာရှိ အမှိုက်ပုံကြီးကို ကြည့်၍ ဆဲရေးတိုင်းထွာ လုပ်နေသည်။ ဤရပ်ကွက်လေးကို တနေ့တုန်းက လန်ခရူဇာနှင့် လာကြည့်သော သူသည် နာမည်ကြီးကန်ထရိုက်တာ တစ်ဦးဖြစ်ကြောင်း သိရသဖြင့် သူတို့ ရပ်ကွက်ကို ဖယ်ရှားပစ်ပြီး တိုက်ခန်းများ ဆောက်လုပ်တော့မည်လားဟု စိုးရိမ်သူက စိုးရိမ်၍ တိုက်ခန်းများတွင် နေရာပြန်ပေးနိုင်သည် ဟု တွေးကာ ပျော်သူက ပျော်နေကြ၏။

ရေထမ်းသမား စိန်ကုလားအား မည်သူက မြှောက်ပေးလိုက်သည် မသိ မလေးရှားရူးရူးနေကာ ဘုန်းကြီးကျောင်းတွင် အင်္ဂလိပ်စာနှင့် ရပ်ကွက်ထဲရှိ တက္ကစီသမား မလေးပြန်ကြီး ကိုတင်မောင် ထံတွင် မလေးစာတို့ကို အပတ်တကုတ် သင်ယူနေလေတော့သည်။ ဒေါ်မမသည် ဟင်းန်ဖုန်းတလုံးကို ပြီးခဲ့တဲ့ နှစ်ရက်က ဘယ်က ငှားလာမှန်းမသိသော်လည်း ဈေးသွားလျှင်ပင် ညည်းကအေ ငါကအေနှင့် အသံကုန်ဟစ်ကာ ဖုန်းပြောနေလေ၏။ ထို့ကြောင့်ပင် သူ့ကို ရပ်ကွက်က လေဒီဖုန်းဟု တညီတညွတ်ထဲ အမည်သမုတ် လိုက်ကြ၏။ ကျော်မင်းကို သူငယ်ချင်းများက ဆရာသမားဟု ၀ိုင်းသတ်မှတ်လိုက်ကြသည်။ ပေါက်စသည် ရှိုးပွဲတခုတွင် ရက်ပ်အဆိုတော် တစ်ယောက်နှင့် ရင်းနှီးခွင့်ရသဖြင့် အပျော်ကြီးပျော်နေ၏။ ဆယ်အိမ်ခေါင်း ကိုမင်းမင်း အိမ်ရှေ့မှ အမှိုက်ပုံကြီးအား စည်ပင်မှ လာရောက်ကျုံးသွား၏။ နောက်ထပ် မည်သူမှ အမှိုက်မပုံရတော့ကြောင်း၊ ပုံတာ တွေ့ရင် ဒဏ်တပ်မည်ဖြစ်ကြောင်း ရပ်ကွက်လူကြီး ဦးတင့်ဆွေက တချက်လွှတ် အမိန့်ထုတ်ပြန်လိုက်သည်။ ကိုသာထွန်းသည် မနက်ကပင် ရပ်ကွက်ဘုန်းကြီးကျောင်းတွင် ရဟန်းခံလိုက်လေ၏။ သူ့အား မည်သူမှ သာဓုမခေါ်ကြပေ။ ဗာဒံပင်ကြီးအောက်တွင် ချိန်းတွေ့နေသော စုံတွဲလေး တစ်တွဲရှိ၏။ ထို့နောက် မိုးများ သည်းထန်စွာ ရွာသွန်းသောကြောင့် ရပ်ကွက်လေးသည် ရေလျှံကုန်တော့သည်။